NAWLBIA BIAKAM HLUN LE BIAKAM THAR KONG=/=/=======================Bible ah kan hmuhmi nawlbia kong

NAWLBIA BIAKAM HLUN LE BIAKAM THAR KONG =/=/======================= Bible ah kan hmuhmi nawlbia kong a si,nawlbia chungah (1)Nawlbia ngan(2)nawlbia pahra (3) nawlbia thar timi a si. Biakam hlun nawlbia pahra hi ahohman nih an tuah kho lo caah minung paoh hi nawlbia in kan thi cang.cu nawlbia ah kan thi tikah Pathian he ral kan si i,pathian he kan petlaihnak a cat cang,cu sual thihnak in kan luat khawhnak dingah thisen lawnglawng luat khawh a si cang caah,thihnak chungin chanhchuahtu dingah Jesuh khrih vawlei ah a ratnak le tuukawm bantuk in vawlei mi vialte sual ngaihthiamnak dingah Jesuh khrih cu raithawihnak tuukawm ah Pathian nih a tlah mi a si. Khrihfa tampi nih dinfelnak kan ti le kan ttanh ngai nain dinfelnak tuah kho ttun loin thluak in chukcho ah merh i maihmilhnak lam an kawl i cucu midang hmaiah dinfel ngaiin bia an chim i,cucu dinfel in ka um an ti cio i,lenglei tuahnak in an i zuam ciammam hna i,mi hmaiah tam deuh a pek mi paoh khi a piangthar ee,dinfelnak e an ti ,cheuhra ceukhat pek cu an i zuam ciammam hna i ,tam deuh a pek mi paoh khi an khrihfa buu cio mithmaitha an hmuh.cu vialte cu kei midinfel ngai ah an i ruat i,biaknak le ah aa zuam ngaimi kh piangthar le dinfel ngai ah an i ruat. Kha vialte na tuahmi vialte na ruahnak le na thinlung in pathian na kawl lo i,minung hmai lawnglawng ah na pek mi pawl kha cu pathian nih a cohlang lai lo.na pek sawhsawh men minung hmai ah mithmaitha hmuhnak ding caah le khrihfa buu minthatnak ca'h lawng men a si. Nawlbia vialte hi kan tuah dih kho lo caah Nawlbia lakah a ngan bik cu (matthai 22:36-40). 1. Matt 22:35-40) Nawlbia Ngan (Mar 12.28-34; Luk 10.25-28) 34 Jesuh nih Sadusi mi kha holh awk hngal loin a tuah hna ti kha Farasi mi nih an theih tikah, hmun khat ah an i pum i ,35 annih lak i pakhat, Phungbia cawnpiaktu saya a simi nih khan bia in foih a timh.36 Aa thawh i, “Saya, Phungbia chungah hin zei nawlbia dah a ngan bikmi a si?” tiah a hal.37 Jesuh nih cun, “ ‘Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,’38 ti hi a ngan bik le a biapi bik nawlbia cu a si.39 A hun changtu biapi bik nawlbia cu, cu bantuk thiamthiam cu a si i, ‘Na innpa cu nangmah naa dawt bantukin na dawt lai,’ ti hi a si.40 Moses Nawlbia vialte le profet hna cawnpiaknak vialte cu, hi nawlbia pahnih chungah hin an i khumh dih,” tiah a ti. 1) Jesuh kha Nawlbia lakah a nganbik cu zeidah a si tiah an hal lioah Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,’ti hi a ngan bik le a biapi bik nawlbia cu a si. 2).A hun changtu biapi bik nawlbia cu, cu bantuk thiamthiam cu a si i, ‘Na innpa cu nangmah naa dawt bantukin na dawt lai,’ ti hi a si. Moses Nawlbia vialte le profet hna cawnpiaknak vialte cu, hi nawlbia pahnih chungah hin an i khumh dih. minung tampi nih miphun a lianngan tertu cu dinnak le felnak a si tiah ruat a si.minung poah nih cu dinfel nak cu kan kawl cio hna tikah Kanmah nun le midang nun midang le midang nun tah le Degree a niam ee a sang deuh a fel deuh ee a fel lo deuh ee tiah tampi cawithlaihnak kan ngei hna tikah a tling kho lo pastor le cathiam sansan zong hlei hlah misawhsawh nih pastor le cathiam sangsang kha an nun le ziaza in an pemh lo an ti,cathiam sang pawl nih le thlarau tirawl a cawm kho loin buu khat le buukhat dohnak lawnglawng an chuah pi,pakhat le pakhat kut dongh in i sawhnak lawnglawng a si ko.Nawlbia cu a hohman nih kan tlinh kho lo caah kan thi dih. Nawlbia lakah a nganbik cu mah cu tuah hlah mah cu tuah ti kha si ti loin kan bawipa le Pathian kha kan thinlung le kan ruahnak dihlak in dawt kha a si ko.Pathian dawt timi cu Pathian bia kha kan thinlung le kan ruahnak ah a zungzal kan nunnak he thlaih peng a herh i ,Pathian bia kan thinlung le kan ruahnak kan riahter peng a si ah cun Pathian bia nih kan ruahnak thinlung a tha le thalo kha theihter nak a kan pek peng i,cucu Pathian dawt cu a si ko.midang nun va tah len kha a kan fial lo.mah le mah kha thinlung dihlak le ruahnak dihlak in Pathian bia in kan nunah thlaih le theihter peng kha a si. Na innpa cu nangmah naa dawt bantukin na dawt lai,’ ti hi a si. Moses Nawlbia vialte le profet hna cawnpiaknak vialte cu, hi nawlbia pahnih chungah hin an i khum dih. Kan innpa cu a hodah a si timi hi a theihlo lomi tampi kan um men lai,kan innpa cu kanmah pawngte ah a um pengmi minung pawl kha an si ko.kan pawngkam ah naihbik mi kha na innpa cu a si ko.na pawngkam ah a harsa mi na daw kho hna lo i,na nihsawh hna ahcun na innpa daw lo cu a si ko.kei zong ka pemh hlan ah cun innpa bible nih a timi ka pemh hlan cun ka pawngkam ummi khi dawt zia ka thiam ve hna lo i duhdan hna ka rak ngei ttheo ve,nain Pathian bia ka pemh taktak hnu lawngah bible nih innpa a timi le a sawh duhnak ka fiang hnu ah nun zia ka thiam ve.cucaah innpa timi cu kan pawngkam ah a ummi kha dawt kha a si ko. Zei nawlbia hman hi kan tuah kho lo caah tuah lo awk a tha lomi cu pahnih cu Bawipa na Pathian cu na lungthin dihlak le na ruahnak dihlak le na nunnak dihlak in na dawt lai,ti hi a ngan bik le a biapi bik nawlbia cu a si.Na innpa cu nangmah naa dawt bantukin na dawt lai,’ ti hi a si.hi pahnih te hi kan tuah ko ahcun vancung pennak he aa hlat lomi lam a si. Mark 12:28-34) Nawlbia Ngan (Mat 22.34-40; Luk 10.25-28) 28 Cuka ah cun bia an i almi a rak theitu Phungbia cawnpiaktu saya pakhat a rak um. Jesuh nih Sadusi mi hna cu thalo tein a leh hna ti kha a hngalh tikah a ra i, “Nawlbia lakah hin zeidah a biapi bik?” tiah a hal. 29 Jesuh nih a leh i, “ ‘Israel mi hna ngai tuah u; Bawipa kan Pathian lawnglawng hi Bawipa a si. 30 Bawipa nan Pathian cu nan lungthin dihlak le nan nunnak dihlak le nan ruahnak dihlak le nan thazang dihlak in nan dawt lai,’ ti hi a biapi bik cu a si. 31 Cun a pahnihnak cu, Na innpa kha nangmah naa dawt bantukin na dawt lai, ti hi a si. Hi hna pahnih nakin a biapi deuhmi nawlbia dang an um ti lo,” tiah a ti. 32 Phungbia cawnpiaktu saya nih cun Jesuh cu a leh ve i, “A tha ngaingai, saya! Na chimmi cu a hmaan, Bawipa lawnglawng hi Pathian cu a si taktak i pathian dang zeihmanh an um ti lo. 33 Cucaah mi nih hin Pathian cu kan lungthin dihlak le kan ruahnak dihlak le kan thazang dihlak in kan dawt awk a si i kan innpa cu kanmah bantukin kan dawt awk hna a si. Hi nawlbia pahnih zulh hi Pathian sin i khangh raithawinak le raithawinak dangdang zong pekchanhnak nakin a tha deuh,” tiah a ti. 34 Jesuh nih a bialehnak cu a tha ngai ti kha a hmuh i, “Pathian Pennak in naa hlat lo,” tiah cu pa cu a ti. Hi hnuah hin cun ahohmanh nih Jesuh kha bia an hal ngam ti lo. Pathian kha kan thinlung le ruahnak dihlak in le innpa dawt dawt kha Nawlbia lakah a ngan bik an si ko.Hi nawlbia pahnih zulh hi Pathian sin i khangh raithawinak le raithawinak dangdang zong pekchanhnak nakin a tha deuh. Raithawihnak le pekchannak nakin a tha deuh mi cu Pathian kha ruahnak dihlak thinlung dihlak le innpa dawt kha a si ko.mithatnak le minthanhnak ca'h i pekchan lengmang le raithawihnak timi cu ngaithiamnak kha a si ko, cu tuah lengmang nakin a tha cu i ,cu lam cu pathian pennak he aa hlat lomi lam cu a si.Cucu kan tuah ko ah cun Pathian pennak chungah kan lut cu a si ko. ÌI. NAWLBIA 10 Exodus 34:28) Moses cu Bawipa sinah khan ni 40 le zan 40 a um i zeihmanh a ding lo i a ei lo. Lungtlap cungah khan biakamnak bia cu a tial hna — nawlbia pahra cu. Deutro 4:13 Cun tuah awkah nawl an pekmi hna a biakamnak kha nannih sinah a thanh, mah cucu nawlbia pahra kha an si; lung tlap hnih cungah a tial hna. Exodus 20:1-17) Nawlbia Pahra (Deu 5.1-21) 20:1 Pathian nih hi bia vialte hi a chim hna. 2 Aa thawh i, “Sal i nan cannak inn chung, Izipt ram chungin an chuahtu hna cu Bawipa nan Pathian hi ka si. 3 “Keimah hlei in pathian dang zeihmanh nan bia lai lo. 4 “Vancung i a ummi thil si hna seh, vawlei i a ummi thil si hna seh, ti chung i a ummi thil si hna seh, vawlei tang i a ummi thil si hna seh, cu hna mui he aa lo in siasal zeihmanh nan i ser lai lo. 5 Zei bantuk siasal hmanh an si ah an hmaiah nan kun lai lo i nan bia hna lai lo, zeicahtiah keimah hi Bawipa nan Pathian cu ka si i nahchuah a ngeimi Pathian ka si. A ka huatu cungah cun chan thum chan li tiangin an tefa hna cungah khan dantatnak ka tlunter. 6 Asinain a ka daw i ka nawlbia a zulmi hna cungah cun chan thong khat tiangin a fekmi ka dawtnak kha ka langhter.7 “Bawipa nan Pathian min cu ningcang loin hmang hlah u, ningcang loin ka min a hmangmi cu dan ka tat hna lai.8 “Sabbath ni kha philh hlah u, Bawipa caah va hmang u. 9 Nan rian vialte kha ni ruk chung nan tuan lai, 10 sihmanhsehlaw ni sarihnak ni cu dinh ni a si i Pathian caah nan hman lai. Cu ni ah cun ahohmanh rian nan tuan lai lo, nanmah siseh, nan fale si hna seh, nan sal si hna seh, nan satil si hna seh, nan khua chung i a ummi miphun dang si hna seh, ahohmanh rian nan tuan lai lo. 11 Ni ruk chungah Bawipa nih van le vawlei le rili le an chung i a ummi thil vialte kha a ser hna i ni sarihnak ni ah cun aa din. Cucaah cun Bawipa nih dinh ni cu thluachuah a pek i amah ca rian tuannak caah a duh.12 “Nan nu le nan pa kha upat hna u, cu ti nan tuah ahcun, Bawipa nan Pathian nih an pekmi hna ram ah hin saupi nan um lai.13 “Lai nan nawng lai lo. 14 “Va cung pa duh siseh, nupi cung nu duh siseh, nan tuah lai lo. 15 “Nan fir lai lo. 16 “Nan minung hawi cungah tehte dinglo nan si lai lo. 17 “Nan innpa inn kha nan mit a thi lai lo. A nupi siseh, a salpa siseh, a salnu siseh, a cawtum siseh, a laa siseh, a ngeihmi thil paohpaoh si hna seh, nan mit a thi lai lo,” a ti Nawlbia pahra chungah a hohman tlamtlin tein a tuah kho mi kan um lo,mi vialte Nawlbia pahra ah kan thi cang,Nawlbia in zungzal nunnak vanram co/phan ding sisehlaw le nawlbia pahra ah nun tah cio sisehlaw pakhat le pakhat kan thihnak kha aa khat lai lo.Nawlbia chungin nunnak kan hmuh kho lai lo sualphawt peng a si lai,cucu Pathian nih a theih tikah sualnak in kan thih ko lio i lam a pit kalnak lam a um lo lio ah le cu thihnak cu thisen lawnglawngin ngaihthiam khawh a si caah fapa ngeichun Jesuh khrih tuukawm kha Vawlei mi vialte sual ngaihthiamnak caah raithawih a si.cu caah Jesuh khrih cu zungzal nunnak innka le sual ngaithiamnak lam le biatak le nunnak cu a sinak a si.nangmah le nangmah nun kha nawlbia tahnak in na caan na dihter sual maw,midang nun kha nawlbia tahnak in na caan na liam ter sual ahcun a tu tein i mer law kaltak cang ko ,cu lam cu nun thattu lam cu a si i,nunnak lam zeitindah ka kawl lai timi kha cuanh ko cang. III. John 13:31-35) Nawlbia Thar 31 Judas a chuah hnuah khan Jesuh nih, “Atu cu Mi Fapa hi sunparnak kha pek ka si cang; atu cu keimah thawngin Pathian nih khan sunparnak cu a hmuh cang. 32 Pathian nih keimah thawngin sunparnak cu a hmuh ahcun, Pathian zong nih Mi Fapa hi thangthatnak a ka pek ve lai i cucu rau lo tein a tuah lai. 33 Ka fale hna, nan sinah sau ka um ti lai lo. Nan ka kawl lai, sihmanhsehlaw ‘Ka kalnak ah cun nan ra kho lai lo,’ tiah Judah mi ka chimh hna bang khan nannih zong kan chimh hna. 34 Nawlbia thar kan pek hna: pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si. 35 Pakhat le pakhat nan i dawt ahcun mi vialte nih, hi hna hi amah a zultu kha an si, tiah an in hngalh hna lai,” tiah a ti hna. Nawlbia thar ah cun Jesuh nih Keimah nih kan dawt hna bantuk hin pakhat le pakhat nan i dawt awk a si.Pakhat le pakhat nan i dawt ahcun mi vialte nih, hi hna hi amah a zultu kha an si, tiah an in hngalh hna lai,” tiah a ti hna. Pathian nih a sunpernak cu Jesuh khrih thawngin sunpernak a kan hmuhsak mi kan lawm lai i kan thangthat kan hlorh lai kan upat lai.lianngannak le thangthat upat sunpernak cu Pathian pakhat ca'h lawnglawng ah kan pek awk a si.cucu pakhat le pakhat dawtnak he kand,dirh ttih kha a si. Kanmah tein i zoh cio hna u sih pakhat le pakhat kan i dawt maw,khrihfa buu khat le buu khat teh an i dawt kho maw? 1John 2:7-17) Nawlbia Thar 7 Ka dawtle hna, nan sin i ka hun tialmi hi nawlbia thar a si lo; a hramthawkte i nan rak theih lengmangmi nawlbia hlun kha a si ko. Cu nawlbia hlun cu nan rak theih cangmi bia kha a si. 8 Asinain, nan sin i ka hun tialmi nawlbia hi a thar a si; zeitindah a thar a si tiah muihnak cu a lo cang i ceunak taktak cu a tlang cang. Cucu Khrih nih khan a langhter i nanmah zong nih nan langhter ve. 9 Ahohmanh ceunak chungah ka um a ti i a unau a hua tungmi cu, atu tiang hrimhrim hin, muihnak chungah a ummi a si ko.10 Ahohmanh a unau a dawmi cu ceunak chungah a um i cucaah midang a sualtertu ding zeihmanh a chungah a um lo 11Sihmanhsehlaw a unau a huami cu muihnak chungah a um i muihnak nih cun a mit a cawtter caah cuka chung i aa chawh ah khuazei ah ka kal ti awk hmanh a hngal lo.12 Ka dawtle hna, nan sualnak cu Khrih min ruangah ngaihthiam nan si caah hi ca hi kan kuat hna.13 Pale hna, a hramthawk tein a ummi kha nan hngalh caah nan sinah hi ca hi ka tial. Tlangval hna, nannih nih Mithalopa kha nan tei caah hi ca hi kan kuat hna. 14 Ka dawtle hna, Pa kha nan hngalh caah hi ca hi kan kuat hna. Pale hna, a hramthawk tein a ummi kha nan hngalh caah kan kuat hna. Tlangval hna, nan thawn caah kan kuat hna; Pathian bia cu nan chungah a um i Mithalopa kha nan tei cang.15 Vawlei hi siseh, a chung thilri hi si hna seh, tlaihchan hna hlah u. Vawlei hi nan tlaihchan ahcun, Pathian dawtnak kha nan chungah a um lo.16 Vawlei ta a simi thil paohpaoh — pumsa duhnak tehna, mi nih zoh an duhmi thil hna, mi nih porhlawtnak ah an hmanmi thil tehna hi Pa sinin a rami an si lo; vawlei in a rami lawngte an si dih.17 Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung. Unau a huami cu muihnak ah a ummi an si i,unau a dawmi cu ceunak ah ummi an si tiah bible nih a kan chim.unau a dawlo mi cu kalnak lam a theihlo mi muihnak chungah a ummi an si.khoika hmun hma ah ka um timi theih na duh ah cun na unau na daw hna maw daw hna lo ti kha zoh law na daw hna lo ahcun muihnak chungah na um cu a si ko.unau na daw hna lo ahcun ceunak chungah ka um lo ti kha theih ding a si ko.muihnak nih na mit an cawtter caah tuah ding na theih lo i,lam kalnak na theih lo caah na unau kha na daw kho hna lo cucu muihnak chungah na um a si ko.. Vawlei hi siseh, a chung thilri hi si hna seh, tlaihchan hna hlah u. Vawlei hi nan tlaihchan ahcun, Pathian dawtnak kha nan chungah a um lo.vawlei a tlaichan mi vawlei kong lawnglawng an lungthin a khat i ,vawlei duhnak pumsa duhnak vialte le vawlei caan le vawlei rikhiahnak vialte an phak lo poah ah sunghzatlak ah an ruat i an lung a dongh tawn,Cucu muihnak chungah a um i lam kalnak a theihlo mi nun muihnak chungah tlonglen cu a si.vawlei an tlaihchan caah Pathian an hmuh kho lo i,an unau an dawt kho hna lo. Ceunak chungah a tlonglen mi cu vawlei pumsa duhnak le vawlei thilri le vawlei sining in zoh in sunghzatlak nak le vawlei sining cawlhcanghnak vialte an phak khawhlo zawnah cu nakin a ngan deuh mi Pathian an hmuhkhawh,vawlei an tlaihchan lo caah Pathian dawtnak kha an hmuh khawh.Cucu ceunak lam cu a si.vawlei tlaihchan loin Pathian a tlaihchan micu zungzal nunnak lam a si. Rom 6:Dinnak Sal Hna 15 A si kun ahcun zeitin? Nawlbia tangah um ti loin Pathian vel tangah kan um cang caah kan sual awk a si lai maw? Si hrimhrim hlah. 1John 2:3-6) 3 Pathian kha a nawl kan ngaih ahcun, amah kha kan hngalh tiah fiang tein kan hngalh. 4 Pakhatkhat nih, “Amah cu ka hngalh hrimhrim,” tiah a ti i a nawl a ngaih tung lo ahcun, cu pa cu milihchim a si i a chungah biatak zeihmanh a um lo.5 Sihmanhsehlaw a bia a ngaimi cu a chungah Pathian dawtnak a tling. Pathian chungah kan um ti fiang tein kan hngalhnak ding cu hihi a si: 6 Pathian chungah kan um, a timi paoh nih cun Jesuh Khrih bantukin kan um awk a si. Pathian chungah ka um kan ti a si ahcun Jesuh khrih lungthin le ruahnak teminnak nun vialte hi ka cawn awk a si.Midang nih kan cungah sualphawtnak kan tuar tikah kanmah nih kan tonmi sualphawtnak nak le intuarnak nakin Jesuh khrih Sualphawt le intuarnak vialte kha ruat hmasa in nitin tein karhlang chin lengmang a her.Cucu nawlbia kan zulh i hngalh cu a si ko. Levi 22::31 “Cu bangin ka nawlbia cu nan ulh hna lai i nan tuah hna lai: keimah cu Bawipa ka si. Matt 5:17-22) Phungbia Kong Cawnpiaknak 17 Moses Nawlbia hna le profet hna cawnpiaknak kha hrawh awkah a ra, tiah ka ruat hlah u. Annih kha hrawh awkah si loin, an cawnpiaknak kha tlinter awk tu ah ka ra. 18 Mah hihi philh hlah u! Van le vawlei an hmunh chung paohpaoh cu Phungbia hi a deh pakhatte hmanh siseh, a rin pakhatte hmanh siseh a rawk lai lo zeizong vialte hi a donghnak an phak hlanah cun an rawk lai lo. 19 Cucaah cun ahohmanh nih nawlbia lak i a hme bik te hmanh kha zul loin a um i midang zong kha cu bantukin a cawnpiak hna ahcun, cu pa cu Vancung Pennak chungah a hme bik a si lai. Cun Nawlbia kha a zul i midang zong kha, cu bantukin zulh awk, tiah a cawnpiakmi hna cu, Vancung Pennak ah mi ngan a si lai. 20 Cucaah Pathian nih tuah hna seh, ti an duhmi hna tuahnak ah, Phungbia cawnpiaktu saya hna le Farasi mi hna nakin nan fel deuh lo ahcun, Vancung Pennak chungah cun nan lut kho lai lo. Thinhunnak Kong Cawnpiaknak (Luk 12.57-59) 21 Lai va nawng hlah u, lai a nawngmi paoh cu biaceihtu hmaiah chuahpi a si lai, tiah hlanlio mi an rak ti tawn hna, ti kha nan theih. 22 Asinain kei nih cun, A u a nau cung i a thin a hungmi paoh cu biaceihtu hmaiah chuahpi nan si lai i a u siseh, a nau siseh,Zeiruaramlo, a timi paoh cu biaceihtu bu sinah chuahpi nan si lai; cun ahohmanh, a u siseh, a nau siseh,Mihrut a timi paoh cu hell mei chung i tlak awkah aa tlakmi nan si lai, kan ti hna Jesuh a ratnak cu prophet le moses hrawh dingah si loin tlinter awkah a si.moses nawlbia ahcun lai va nawng hlah ti a si i,Jesuh khrih nih a rat nak cu na unau hua hna hlah,unau a hua mi cu biaceih hmai ah chuahpi a si lai.a unau mihrut a ti i a nihsawh mi hna cu hell mei chung i tlak awkah aa tlakmi an si lai,dawtnak kha a langhter duhmi a si.moses nawlbia pahra chungah lai va nawng hlah timi le Jesuh khrih vawlei a ratnak hawhmi nawlbia thar dawtnak timi tahchun in zoh u sih law, 1.lai va nawng hlah a dih donghnak a si cang ko 2.unau huat le mihrut tiah nihsawh Hell tlak he a tahchun mi a si. Moses nawlbia ahcun tuahsernak ziaza thalo in a si.Jesuh khrih vailam a ratnak cu thinlung put kha a si.Jesuh khrih vel lio caanah na tuahsernak in vancung phak a si lo i,Jesuh khrih lio caan ah thinlung kha a si. Cucaah tuahsernak lawnglawng in si loin thinlung tu in Pathian sinah tuan a herhnak dawtnak kha a chim duh mi a si. Tuahsernak kan ti lengmang mi nakin pathian hi kan ruahnak le kan thinlung dihlak in kawl i kan dawt i,kan pawngkam ummi innpa hna kha dawt ding kha a si i ,cucu kan tuah ahcun vancung pennak he aa hlat lo.Jesuh khrih ratnak cu dawtnak lungthin a si i,zeitluk indah dawtnak bia pi ti ahcun unau a hua mi le mihrut tiah a nihsawh tu cu hell tlak dingah aa tlak a ti.dawtnak lungthin tuhi bia pi bik a si i,thinlung le ruahnak le dawtnak hi a ho caah a si lai ,khoika ah zeicahdah ka hman lai timi hi theih fiang hmasa bik a herhnak a si.Pathian nih na thinlung ruahnak kha an hal peng mi a si,cucaah na thinlung le na ruahnak kha Pathian na pek thiam a herh.